黃之鋒好適應監躉生活　「反正唔係第一次坐監」

　　前香港眾志秘書黃之鋒可謂係坐監老手，話自己不是第一次坐監，所以早就適應在囚嘅生活，而家被分配做貼快勞(文件夾)皮嘅工作。被問及對判刑嘅準備，佢就話無法預期喎。

　　攬炒派前議員邵家臻日前喺社交平台發文，話晨早流流，千裏迢迢去赤柱監獄探黃之鋒監，點知「畀人串爆」。佢話同之鋒打招呼講「好耐冇見」，對方就話「不是啊，每次上庭都見到我，只是傾不到偈，打不到招呼而已」。問喺監獄嘅適應情況，黃之鋒則話反正唔係第一次坐監，所以物資上和心理上的適應沒有問題，喺赤柱都係正常咁寄信同收信，又話而家佢是甲級還柙人士，只能做貼快勞皮的工作。至於喺監獄嘅生活，黃之鋒話因有讀寫障礙，又唔鍾意運動，大多時間都係聽收音機，仲串邵家臻唔識一首關於放監嘅歌㖭。

　　話說，黃之鋒之前涉及的3案合共被判囚23.5個月，所有刑期已於3月初完成，但就冇得出冊，皆因仲要等非法「初選」案審訊，而家轉到赤柱監獄還柙。