港鐵新廣告籲改變習慣「左右企穩」掀兩派網民大戰

　　港鐵今年找來藝人林海峰參與宣傳，廣告中可見一男一女併立在扶手電梯上，廣告標語寫着「改變習慣，安全最讚」，並且說「左右企穩，安全要穩」，即是乘客應該站在左右側，不建議乘客在左側通道行走。

　　廣告旋即引起網民熱議，有支持「左行右企」的網民直斥廣告「離地」，「繁忙時間全世界都左上右企，你同我講企穩，管理層有冇現場睇過呀，左邊無人會企囉」、「痴線，兩邊企哂啲趕時間嘅點?睇住班車到仲企定定唔跑?無可能，兩邊企哂只會引發衝突，先而口角繼而動武」、「日本而家都教育緊兩邊都企，不過同香港一樣冇人理」。

　　不過，有網民則支持「左右企穩」，「唔該搞清楚是扶手電梯不是電梯」、「要行就行樓梯，扶手電梯設計根本就唔係比人行」、「自動電梯左面邊行，撞到人撞跌人你孭?拍心口話你孭但你孭得起!」、「趕時間就早啲出門啦」。